PENITENTZIAKO SAKRAMENDUA
I. — KONTZIENTZIAKO ETSAMINA
Othoitza
Ene Jainkoa, nahi duzu ene bekatuen aphezari erraiterat joan nadin, haren ganik barkamenduaren ardiesteko. Bainan nola erranen diozkat, ez baditut nihaurek ezagutzen ? Zato beraz, Jauna, argi zazu ene bihotza, ez dadin geldi ni baitan bekaturik, nik ezagutuko eta hastiatuko ez dudanik.
Etsamina
Jainkoaren manamenduetan
1° Jainko bat adora zazu, etc. — Othoitzak huts-egin ? — Gaizki egin ? — Elizan gaizki egon ? — Erlisioneaz, aphezez, gauza sainduez gaizki mintzatu ? — Fedearen kontra bekatu egin, fedezko zerbeit egiaz dudan egonez ? — Erlisionearen kontrako libururik edo kasetarik irakurtu ?
Horietarik bakotxa zonbat aldiz ?
2° Juramenturik ez duzu, etc. — Gezurraren finkatzeko Jainkoa lekuko hartu ? — Beharrik gabe zin egin ? — Blasfemiorik egin ? — Boturik hautsi ?
Horietarik bakotxa zonbat aldiz ?
3° Igandeak begira zatzu, etc. — Meza Saindua huts-egin igande edo phesta-buruetan, bere faltaz ? — Mezarat berantegi ethorri ? — Meza gaizki segitu ? — Lanean arizan egiazko beharrik gabe ?
Horietarik bakotxa zonbat aldiz ?
4° Ait'amak ohora zatzu, etc. — Ait'amak ez aski maitatu ? — Desobeditu ? — Zinkurinaka obeditu ? Heien alderat errespetua galdu elhez… obraz ? — Heieri pena eman, heiek nahi ez bezala biziz ? — Heien hutsak agertu ? — Nausieri desobeditu ? — Errespetua galdu ?
Horietarik bakotxa zonbat aldiz ?
5° Nehor obraz hilen ez duzu, etc. — Norbeit jo ? — Kolpatu ? — Nehori elhe gaixtorik erran ? Norbeitentzat herrarik atxiki ? — Gaizkirik desiratu ? — Gaizkirik egin ? — Eskandalarik eman : hitzez, obraz ? — Gaizkia norbeiti erakatsi ?
Horietarik bakotxa zonbat aldiz ?
6° eta 9° Lohikeria eginen ez duzu, etc. — Garbitasunaren kontra bekatu egin : gogoz, gutiziaz, behatzez, hitzez, obraz ? — Kantu tzarrik kantatu ? — Liburu tzarrik irakurtu ? — Zinema tzarretan, dantza eta libertimendu lanjerosetan ibili ?
Horietarik bakotxa zonbat aldiz ?
7° eta 10° Bertzerena ebatsiko ez duzu, etc. — Zerbeit norbeiti ebatsi ? — Burhasoeri ebatsi ? — Sal-erospenetan norbeit enganatu ? — Jokoan enganatu ? — Hatzeman dirua edo gauza gibelerat ez eman ? — Zorrak ez pagatu ? — Norbeiti zerbeit funditu ? — Bertzerena gaizki desiratu ?
Horietarik bakotxa zonbat aldiz ?
8° Lekukotasunik ez duzu, etc. — Gezurrak erran ? — Laguna gaizki jujatu ? arrazoinik aski gabe ? — Medisentziarik erran ? — Kalomniarik erran ?
Horietarik bakotxa zonbat aldiz ?
Elizaren manamenduetan
Phazkoak ez egin ? — Haragirik jan sori ez den egunetan beharrik gabe edo permisionerik gabe ? — Barur ez egin behar zelarik ?
Horietarik bakotxa zonbat aldiz ?
Bekatu Kapitaletan
Urgulua. — Urgulutsu izan, bere burua estimatuz bertzeak baino gehiago, bere burua agertu beharrez, bere burhasoez ahalgetuz ?
Zikoizkeria. — Ontasuneri atxikiegia izan ?
Jelosia. — Lagunari gertatu gaitzaz atsegin hartu ? — Hari gertatu ongiaz trixtatu ?
Gormandiza. — Sobera jan edo edan ? — Mozkortu ?
Kolera. - Sobera khexatu ?
Alferkeria. — Denbora galdu ? Manatu lana ez egin, gaizki egin, lazoki egin ?
Horietarik bakotxa zonbat aldiz ?
Beha ere zure egun guzietako eginbideak nola bethe ditutzun.
II. — KONTRIZIONEA ETA XEDE ZINA
Bekatuak ez ditazke barka ez baduzu heien urrikia, eta ez baduzu hartzen xede zina hetan berriz ez erortzeko.
Urriki eta xede horien azkartzeko, ibil gogoan :
hiltzea ;
ifernua ;
zerua ;
Jesusen kurutzean hiltzea...
Othoitz egin Jesusi eta Andredena Mariari, eta erran oraidanik Kontrizionezko akta.
III. — KOFESIOA
Kurutzearen seinalea egin ondoan, erran :
Benedika nezazu, ene Aita, zeren egin baitu bekatu.
Gero :
Kofesatzen nitzaio, « ene faltaz » hitz horietaraino.
Gero :
Noizkoa den zure azken kofesioa ; absoluzionea errezebitu zinuenetz eta penitentzia egin.
Erran bekatuak, deus gorde gabe, ahalaz zure baitarik ; aphezaren galdeeri ihardets leialki, erranez : « Aita » eta ez : « Jauna ».
Gero : « Kofesatzen nitzaio » burura, arthoski entzun aphezaren erranak, eta harek absoluzionea emaitean, emeki eta bihotzaren erditik erran Kontrizionezko Akta.
IV. — PENITENTZIA
Zure lekurat itzuli-eta, errazu ahal bezain laster, bainan ez lasterka, aphezak eman penitentzia.
Eskerrak bihur Jainkoari eta Ama Birjinari, eta elizatik athera Sakramendu Saindua adoratu ondoan.